“Esku artean duzuna Euskal Herrian ekoiztutako artisau garagardoa da. Egungo lan merkatuaren logikatik at kokatzen den proiektu honek kooperatibismoa du oinarri. Dastatu eta zabaldu.”
Proiektuaren lehenengo fase honetan garagardoa ekoizteko prozesuan sakontzea dugu jomuga. Oinarrizko osagaietatik abiatuta, hau da, ura, garagar-malta, lupulua eta legamia, hasiera eta bukaera arteko prozesu naturala gauzatzen dugu. Pausoz pauso, garagarraren irintzetik hasita, mostoaren hartzidura arte, produktuen gehiengoa Euskal Herrikoak izanik. Gainera, ikuspegi ekologiko zabal batetik, produktuok eskuratzeko eta ekoizteko prozesuan, naturaren gaineko ahalik eta errespetu gehiena gordetzea exijitzen diogu gure buruari.
